Houten keij[ze]r ma[jesetei]ten gezz[]
Eerffpacht brieff Jan die Wijt Hendrickssz van sesten halven mergen lants de data XVc en vijff
Ick Jan die Wijt Henricksz doe kondt allen luijden alsoe Wil[le]m landtcomendeurs inder tijt der balijen van Utrecht Duijtsches Oirden in eenen ewijghen arffpacht vercost end overgegeven heb[e]n bij raede huere comenduren ind gheme[e]n convents va[n] Utrecht sestenhalven mergen lants soe heben ick voir mij end mijne erven dat mij die eerweer dighe vrome heere Steven van Suijlen van Nijeveldt landtkomendeur der balijen voirgen[oemd] die selve sestenhalven marghen lants weder vernijewet ind overgegeve heeft soo groet end cleijn als die aen vierstucken inden kospell van Houten gelegen sijn int eerste derdenhalven mergen dair boven naist gelandt is die paepelicke provend va[n] Houthen
ind beneden die heeren van sindt Marien t Utrecht ind noch eene[n] merge[n] lants dair boven naist gelandt is Hendrick Jan Erntssz erffgename[n] ind beneden die paplicke proevend van Houten ind tijendenhalven hondt lants inden selven kerspell dair bove[] naistgelandt is Jan de Wit de costers erffgename[n] nu ter tijt Wilhe[m] van Oistrum Snoeensz ind benden die sotere van Houthen ind noch twee hondt lants inden selven kerspell dair boven naist gelandt sijn die heeren van sinte Marien voirsz[egd] ind beneden Gijsbert Gheritssz van Schaijck des jairs om drie mude weijts goet coopmans goet ind twee hoenre t betalen ind vrij the leveren then Duijtschenhuijse tot Utrecht opthen selver termijne[n] als op sinte Martijns daghe in der wijnter die een helfte ind op sinte Peters daghe ad cathedram die ander helfte off binnen tween maenden nae elcken termijne
voirsz[egd] onbegreepe[n] opt versuijm van der erffpachte voirsz[egd] ind op een peen va[n] eene mud weijts ind dijt landt voirsz[egd] en sall ick Jan voirsz[egd] off mijn erven daert op come sall nijet splijten noch deijlen noch n geenre vreemder handt brengen mer t sall al tijt comen op eene[n] van mijne[n] rechten end naesten erffgename[n] ind daert dan op comt die sall bijnne[n] jairs koemen mit eene gouden penning ind geven ind neme[n] nijenwe brieve gelijck dese briever inhouden ind off dair versuijm in vijell als inder beta linge ind punthen voirsz[egd] soe mach die landtcomendeur inder tijt sijne[n] vrijen wille doen mitthen voir lande ind nochtant sall ick off mijn erve voirsz dair bij dat versuijm geschiede den Duijschene[n] pacht ind pene[n] op legge[n] in kennisse der wairheit
soe heb ick Jan voirsz[egd] overmits gebreck mijns want ick op deese tijt geen segelen heb gebeden Wouther Luijtgens schout vant goij ind van Houthen desen brieff over mij beden jass[?] voirgen[oemd] ghern gedaen heb ind mijne[r] segell over Jan vuergen[oemd] ind huijre[n] erve aen deesen brieff gehangen int jair ons heeren duijsent tvijffhondert ind vijff den achtienden dach in januario
collationata pns[] copie ad suo originalj teste me noto jnfrasrp hieronimo Joh[ann]is notario ssht[?]
concordat pns[] copia cum suo originali teste me Lamberto infrasto Lambertus Francken de Elborch not[ari]s ssht[?]
