Ick Luijtgen Woutersz die kent en[de] kenlick allen goeden lu[i]den mit desen tegenwoirdige brieven voir mij ende mijne[n] erve ende nacomelinge[n] dat ick ontfange[n] hebbe in
ene ewigen erfpacht van den eerweerdigen en[de] geestlicken heere Johan van Drongelen lantcomenduer van der balie van Utrecht en[de] van sijne convent van
Utrecht van der Duijtser orden drije stucken lands gelegen inden gerechte van den Goije ende Houte daer bove[n] dit ene stucke houden[de] omtrent sevendalve[n] merge[n]
naest gelant is die papelicke prove[n] van houten ende beneden dat co[n]vent van Oudtwijck bu[i]ten Utrecht it[em] t ander stuk houden[de] enen mergen dair is bove[n] naest
gelant die papelicke prove[n] van Houte ende beneden die lantcom[m]endeur voirsz[egd] it[em] dat derde stuck houden[de] omtrent vijff hont lants dair is boven naest
gelant Henrick Groot Jan Eerstsensz erve[n] ende benden dat co[n]vent van Oudtwijck voirsz[egd] elcx ijaers dit voirsz[egde] lant om vier oude Vranckrijcsche scilde drie
ende dertich stuiversz voirden ouden scildt twe groot vlaems vorden stuiver gerekent off ander goet payme[n]t dair voir inder tijt der betalinge the betalen
alle jair die ene helft op sinte martijnsz dach inden wijnter toecomen[de] ende dander helfte op sinte Peters dach ad cathedram dair naestvolgende off
binne[n] eenre maent nae elcken termij[n] onbegrepe[n] en[de] soe vant jairlic erflick en[de] ewelick vrij ende komerloes the levere[n] ten Duijtschenhu[i]se t Utrecht den lantco[m]
menduer inder tijt off sijne scassenaer onde den dijck totten voirsz[egde] lande behoren[de] the bewaren bu[i]ten des oirders cost ende sclide ende voirt sonder enighe
afcortinge van dijcken van slu[i]sen van watergange[n] van beden van scattinge[n] van ouden off van nijwen werck van opene[n] waden van opene[n] oirloge ende van all
dat opt voirsz[egde] lant come[n] off geset mach werden mer vulen inbreken van dijcken van opene[n] waden off off van opene[n] orloge soe dat me[n] dit voirsch[reven] lant
een jair lanck nijet bruken en mocht soe sal men mij dan doen alsmen bove[n] ende beneden doet bij goeden manie[ren] comt sijnt vorwairden dat ick off mijnen
erve ende nacomelingen daer desen erfpacht op come[n] sall dit voirsz[egde] lant in geenre vreemder hant bregen en stellen noch nijet splitten of delen
en sellen bu[i]ten consent der lantcom[m]endeurs indert tijt wesende mer het sal altijt come[n] ende bleve[n] op ene[n] persoen een mans persoen voir
een vrouwen persoen daer die enen nae sijn die dan inder tijt is mede sijnt vorwairde tot wat tijden desen voirsz[egde] erfpacht versterft ende verhandt
wat soe soal die ghene dair desen erfpacht dan op coemt altijt comen binne[n] jairsz en daechs daer nae bij den lantcom[m]anduer inder tijt en[de]
ghene[n] enen gouden pe[n]ninck ende geven ende neme[n] dan nijwe brieve[n] spreken[de] ende inhouden[de] als desen brieff dat bu[i]ten des oirdens koste
behoudelicken verstoringe in den anderen gemeijne[n] goeden daer still voirt[?] sijnt vorwairde waert sake dat ick off mijne erve[n] ende nacomelinge[n] dair
desen erfpacht op come[n] sall dese voirsz[egde] vier oude scilde jairlix opten voirsz[egde] dagen ende termijne[n] nijet en betaelden ende alle puncten en[de] voirwairden
voirsz[egd] nijet en hielden off en voldeden soe kenne ick voir mij ende mijne[n] erve[n] ende nacomelingen voirsz[eg]d daer dese versu[i]menisse bij gesc[h]iede desen erfpacht
geheel ende al verbuert te hebben ende vervallen te wesen van allen recht en[de] toeseggen dat wij tot dien dage toe dair aen gehadt moghen
hebben en[de] soe mach die lantcom[m]endeur inder tijt dit voirsz[egde] lant ende desen erfpacht vrij nae hem neme[n] tot sijns convents behoef en[de] sijne[n] vrijen
wille dair inde doen sonder ijemants wederseggen ende nochtans te hebben sijnen verschenen onbetaelden pacht alle dinge sonder argelist in
kennisse der waerheit heb ick mijne[n] sgel aen desen brieff gehangen ende hebbe voirt omder meerte bestenisse wille gebeden den eersamen
Willem van Scaijck van Oistru[m] desen brieff mede over mij the wille besegelen twelck ick Willem van Scaijck voirsz[egd] om bede van Luijtgen Woutersz voirsz[egd]
geerne heb gedaen en[de] mijnen segel aen desen brieff gehangen int jair ons heere du[i]sent vierhondert vier ende tachtich veertien dage in octobrj