Ick Cornelia Wouter Luijtgensz dochter doen kondt alsoe zelige heer Johan van Drongelen lantcom[m]andeur inder tijtt van Utrehct Duijtsches oirdens Wouter Luijtgensz mijnen lieven vader in eenen
eewigen erffpacht vercosst ende overgegeven heeft bij raede en[de] guet duncken zijne gemeijne comendueren ende broeders des co[n]vents van Utrecht Duijtsches ordens die selve drie stucken
voor mij ende voir mijnen erven dat mij der eerweerdige[n] ende vroeme[n] heeren heer Alebert van Egmondt van Meeresteijn lantcomanduer der balijen van Utrecht duijtsches oirdens die selve drie stucken
lants weder door begeerten Wouters voirsz[egde] mijns lieven vaders vernijet en[de] op mij geset heefft zoe die gelgen zijn inden gerechte van Goij ende Houten die boeven dat eens tuck houdnede omtrent zeven
den halven mergen lants naist gelant is die paplicke proenen van Houten ende beneden dat convent van Oudwick buijten Utrecht item dat andere stuck houdende eenen merg[en] lants dair boven
naest gelant is die paeplicke proenen van Houten voirsz[egd] ende beneden dat Duijtschen huijs selver item dat darde stucke houdende ontrent vijff hondt lants dair boeven naest gelant is Henrick Groet
Jan Erstensz erffge[namen] en[de] beneden dat convent van Oudwick voirsz[egd] alle jair dat voirsz[egde] lant om vier oude franckrijcksche schilden drie en dartich stuiver voirden oudt schildt twe gtroet weijns voirden stuiver
gerekent off ander goet paijment dair voir inder tijt der betalinge the betalen alle jair die eene helfft op t Sinte Meertijns dach inden wijnter ende d ander helfft op sinte Peters dach ad cathedra[m]
off bijnne[n] eene maent nae elcken termijn onbegreepen ende soe voirt erffelijck en[de] ewelick vrij ende com[m]erloes the leveren bijnne[n] zijnen co[n]vensie hem off zijnen scassenair indertijtt ende den
dijck tott desen lande behoerende the bewaeren buijten des oirdens cost en[de] scaede zonder enijge affcortinge van dijcken van sluijsen van watergangen van beden van scatting[en] van ouwen off van nijewen
wercken van open waijen van open oirloge en[de] van all dat opt voirsz[egde] lant com[m]en en[de] geset mach werden meer ghevielen inbreuck van dijcken van open waeden off van open oirloge soe dat men dat
voirsz[egde] lant een jair lanck nijet bruijcken en mochte soe sal men doen als men boven en[de] beneden doet in erffpachten bij goede ma[n]nen voirt zijdt voirwairden dat ick Cornelia voris[chreve]n offmijn
erven dair dese erffpacht op comen sal dijt voirsz[egde] lant in gheene vreemder handt brengen en sellen noch splijten noch deijllen buijten wille des lantcom[mandeur] offt^zijne nacomelinge wille en[de] consent maer sall all
tijtt comen en[de] blieven op een persoen een mans pesoen voor een vrou persoen die dair eenen nae zijn inder tijt behoudelick en[de] uijt sulcke voirwarden tott wat tijden desen voirsz[egde] pacht verstcofft[?]
offte verhandelt werdt soe sal die gene dair dese voirsz[egde] erffpacht dan op compt all tijt comen bijnne[n] jairs dair nae bijden lantcom[m]anduer inder tijt ende geven eene[n] gouden penninck en[de] geven ende
neemen dan nijewe brieven weder in spreeckende ende in houdende desen^als brieff doet buijtens des oirdens cost voirt zijndt voirwairden want zacke dat ick Cornelia voirg[enoemd] off mijn erven en[de]
nacoemeling[en] dair desen erffpacht op comen sall dese voirsz[egde] vier oude vranckrijcxshe schilde jarilix opten voirs[zegde] dagen en[de] termijnen nijet en betaelden en[de] alle punten ende voirwairden voirsz[egd] nijet onder
hielden ofte voldeden soe ken ick Cornelia voir mij en[de] mijnen erven dair die versuijmnisse bij gheschieden desen voirg[enoemde] erffpacht geheel en[de] all verveurt the hebbe en[de] zijne vervalle van allen rechten
ende thoeseggen dat ick tott den dage toe aenden voirsz[egde] erffpacht gehadt mocht hebben ende soe mach die lantcom[m]anduer inder titj dijtt voirsz[egde] landt en[de] desen erffpacht vrij nae hem neme[n] tott zijn
concilies behoeff en[de] zijne vrijen wile dair meede doen soe verre alst den lantcom[m]anduer beliefft en[de] ander nijet sonder ijemans becroen ofte weder seggen ende nochtans hem the betaelen allen zijnen ver
scheenen en[de] onbetaelden pacht alle dunck sonder argelijst in oirconde der wairheijt ende want ick Cornelia voirsz[egd] selffss ghen seggell en hebbe soe heb ick ghebeden Wouter Luijtgensz voirsz[egd] mijnen lieven
vader om desen brieff over mij the willen besegelen t wellck ick Wouter voirge[enoemd] ter beede van Cornelia mijn dochter geerne ghedaen hebbe en[de] mijne zegell ther bede en[de] over Cornelia voirscreven
aen desen brieff doen hangen gegegeven int jair ons heeren duijsent vijff hondert achtendartich den achthiensten julij